ثقافة

خايف.. / فادي جومر

By فادي جومر

Posted on 28 تشرين الأول/أكتوبر,2014

فايق على عِتم القلب
عِين الصبح عميا
والضو ماشي يلحمِس الحيطان
والدرب مو شايف
جاي ع بالي اكتب.. وخايف.

تقيل الحِمِل ع الناس .. وتقيل الحكي
كيف العزا بينقال؟
شو نفع حرفين وسطر.. قدام بحر الدم
شو نفع دمع اِن سَال؟
بحر الأسى .. فوق الحكي، طايف
جاي ع بالي اكتب وخايف.

مشتاق، مشتِقلك، عم انِطر غيابِك..
ما شِفِت ضحكة قلب واِنتِ مو معي
عم خربِش الكلمات عَ الأيام .. بركي ترجعي
كِلو حكي.. كِلو حكي
وما في حكي بيقول قدّيش البرِد
غلغل بعضمي وكَسَّرو
وعربَش عَ قلبي.. ومرمرو
كلما ندهتِلّك تعي
وإنتِ بعيدة .. مبعِّدة
وما عاد فيكِ تسمعي
وبحر العمر: ناشف..
جاي ع بالي اكتب.. وخايف.

بيخطر ع بالي قول
إنّه الكرِم، بعدو ببالي .. والعنب
وإنّه الورق أصفر متل خيط الدهب
وإنه الـ جرى، مهما جرى
بيضل جوات القلب.. غيرو
وإنه انمحى .. كل شي انكتب
وإنه الدرب من بيتنا وجه الصبح
بين البساتين الضحوكة والقصب
بعدو معي .. بغربتي..
وع خطوتي
وبعدو إذا بشتاق.. بيزيد العتب
وهو عن الرجعة معي .. حالف يمين القاسية
وعن رجعتي.. حالف
جاي ع بالي اكتب.. وخايف.

جاي ع بالي اكتب وملهوف
ماسك بإيديّ الهوا القِبلي
عم بوّس الريحة اللي حاملها
جاي ع بالي اكتب ومكسور
مادد عيوني ع القهر
بركي بيحن الدمع، بينزل يغسّلها
خلص الحكي
ما عاد عنّا سِر تـَ نقولو
مكشوف متل السهل قدام الهوا.. وكاشف
جاي ع بالي اكتب، وخايف.

فادي جومر

شاعر وكاتب سوري، من مواليد ١٩٧٩. ينشر في العديد من الصحف والمواقع العربية. له عدة مخطوطات شعرية لم تنشر بعد. كتب الكثير من أغاني الثورة السورية التي تنتاوب على غنائها مجموعة من الفنانين السوريين والعرب كمنعم عدوان،خاطر ضوا، وائل نور، حارث مهيدي، هيمى اليوسفي، وغيرهم. يعيش في ألمانيا منذ ٢٠١٥ وكتب النسخة العربية من نشيد الفرح لبيتهوفن، كما غنت فرق ألمانية من كلماته بالعربية.