مِن الموت..
مِن حقد عَم ياكل عمر
مِن تعب معجون بقهر
مِن حلم عم يشحد صبر
هربوا..
أصلن مِن الحرف العتيق
وريحتن من غار..
وجوهن متل آخر حريق
نارين تحت النار..
تعبن.. وجع حنّ الطريق
والبحر نشّف.. غار..
عَ كتافهن..
متِل اللي حملوا ولادهن
وحقّ انهضم.. يعيشوا متل هالناس
بجيابهن..
متل اللي خبوا جباههن
ومفتاح بيت انهد فوق الراس
ع تيابهن..
متل اللي ردّوا بابهن
يداروا القهر، عملوا الصبر: متراس
وتفرّقوا..
أرواح عمّ تودّع الأبدان وقت غياب:
منهن أكل منّه الوجع.. تـ قال حاج
منهن غرق، بالرمل أو بالبحر لما ماج
منهن وصل.. ولما وصل ردّوا بوجهو الباب
ومنهن وِقِف:
بين الرمل والمي والملح الحلو
مدري طفل
مدري خلِق ختيار عمرو مو إلو
غرقان ع شطّ الحلم!
وكيف الـ وِصِل ع الشط ..
وِصِل ورجع غرقان؟
كم ألف ضلّوا بالبحر
بقلب البحر
وكم ألف غرقوا عِ الرمل
بموج القهر
كل طفل قتلولوا الحلم: “إيلان”..
شاعر وكاتب سوري، من مواليد ١٩٧٩. ينشر في العديد من الصحف والمواقع العربية. له عدة مخطوطات شعرية لم تنشر بعد. كتب الكثير من أغاني الثورة السورية التي تنتاوب على غنائها مجموعة من الفنانين السوريين والعرب كمنعم عدوان،خاطر ضوا، وائل نور، حارث مهيدي، هيمى اليوسفي، وغيرهم. يعيش في ألمانيا منذ ٢٠١٥ وكتب النسخة العربية من نشيد الفرح لبيتهوفن، كما غنت فرق ألمانية من كلماته بالعربية.
